❞ شكة إبرة قلبي جرحته شكة إبرة ولسه بينزف فاكر الحب دا كله أمان وأنا طمنته. بس سألني..... عصفور رغم الجرح مرفرف مش تعبان؟ وإزاي لسه الدم بينزف حتي الأن؟ حاسه بقلب الطفلة هايرجع زي زمان؟ زي العيل يحضن أمه ينام ما يبان؟ فوقي...وبصي علي الأحزان جرحك عدي عليه أزمان وإنتي عواطفك عايزه حنان..... شفت إزاى راسماه بالحرف؟ كنا امبارح غاية الظرف وفجأه.....!!!! قالي بعادنا دا شيئ محسوب وإن كلامنا ..حتي لقائنا مش مكتوب. ولا مكتوب إن إحنا لبعض ولا هنشوف بخيالنا الوعد. شفت ف عينه فراقنا إشارة قلبي إتخض. شفت الشوق ف لقانا بيهدى شفت البعد. فاكر الحلم؟ وكرسي المكتب والبلكونه؟ فاكر كل قصايد الوجد؟ واما بتضحك وبتغمزني إني بجد صحيح مجنونه؟ وأرد وأقولك أيوه أنا فعلا بيك مجنونة؟ لأمش فاكر... حتي خيالك بقي مش قادر يوصف حالك أو يهتم حتي مشاعرك مش مضمونة تجيبك تاني أو نتلم؟ طب مش فاكر كلمة أحبك لما تقولها حرف بحرف؟ واما اتلخبط وأنا بنطقها وتصلحها وأقولك صح؟ وأكيد فاكر لما زعلت وروحت وغيبت واما رجعت وشفت ف عيني دموع وندمت؟ فاكر يومها كلامك إيه؟ كل كلامك كان عن بكره وإنسي وسامحي وسيبي الفكرة وأنا صدقت إن إنتي جرحتي وكانت..... سكره ومش متأكد ليه من قلبي؟ وليه كلمتهم كانت صادقه؟ وليه صدقت؟ وبرضه سامحت... أصل انا عايشه معاك إحساسي ومهما بعدت... طب مش فاكر لما قعدنا ع الكورنيش؟ وأما حكيتلي كل حكايتك منذ طفولتك حتي الجيش؟ وأما سرحت شردت بعينك وأما سالتك قلت مفيش؟ لأ كان فيه دمعه عزيزه كانت ناطه بره جفونك ما بتحكيش بقي معقول كان كل دا..وهم؟ لما الدمعه سكنت قلبي ولا فارقتش؟ وأما لمست بإيدك صدفه طرف صوابعي....؟ ورعشة إيدك ما اتهزيتش ودخلت جوه حدود شراييني ولا طلعتش. طب فاكر وإحنا هناك ع البحر؟ وأما المركب شردت بينا لحد الفجر؟ وإتمنيت الساعه توقف طول العمر. فاكر كل اغاني الصبر؟ فاكر ورده وثومه وعايده؟ وكل اغاني العشق الشاردة؟ وأما رسمت بإيدك لوحه عن الأشواق؟ وشجرة بتحضن ورده جميله بدون أشواك؟ مش بستجدي حب نسيته ولا باتمني القلب يمن ولا هاستني ترجع تاني وأقول هتحن؟ هو سؤال واحد جنني وهز كياني بكره أما أصحي وأكلم صورتك أقولها ايه؟ شكة إبره ولسه بينزف كل دا نزف؟ قلبي جرحني قوي وبكاني معقول يبقي قلبي الجاني. ❝ ⏤هالة المهدي

❞ عشقك ..قدر انا روحي ليه هشه كده كانت ف يوم متمردة شافت كتير واتحملت فاتبدلت .... من عود ريحان لفرع محتاج الندي انا روحي ليه عشقت صبا مشتاق لليل من غير بكا وليه عشقت المستحيل من غير مادمعي يشتكي أنا قلبي ليه عشقك كدا ولا حاسه بيه لما ندا ولا حس حضنك والدفا يجري كطفل من العدا علي ضمة جاية تخنقه يديكي روحه بالفدا وتضيعيه بين دا وده هوانتي ليه قلبك حجر عاشقه اللي جارحك والعدا كارهاني علي طول المدي؟ مع إني نوح وسط الطوفان ف مغرقاني في الندي مستسلمه لجنون جبان شايلاه في قلبك وانصهر. بدل سواد ليلك ضباب ضيع شبابك في السفر عحنتي حبي في التراب ودفنتي عمري في الخطر هو انتي ليه عشقك قدر؟ انا روحي ليه تايهه كده؟ باغزل ربيعك في الصباح ف تفكي توبي في المسا وتحرميني م المباح وعلي الضلوع متسندة كل اما اعود من غربتي ترميني وحدي في الفضا لكني عاشقه ومستحيل اخون غيابك ده القضا انا لسه عاشقه وم المحال اني انسي تاري وما مضي.. ❝ ⏤هالة المهدي