الناس كلها واقفة تعزيني ونا مش شايف قدامي حد، انا من... 💬 أقوال صاحبة الأثر الجميل Aya Alsayed 📖 كتاب يومياتي

❞ الناس كلها واقفة تعزيني ونا مش شايف قدامي حد، انا من كتر الدموع فعلا مش شايف حاجة ولا حد .. على قد ما كان نفسي يكون جنبنا هنا وأحضنه قبل ما يندفن، على قد ما أنا مبسوط علشان دي كانت أمنيته.. بعد العزا بتلت أيام رن عليا صاحب عُمري وقالي عايز اجي اقعد شوية معاك انت في البيت؟ = ايوه يا حبيبي اتفضل. - عامل ايه دلوقت؟ =الحمدلله في نعم. - أنا عارف اللي جواك.. حاسس بيك ومجرب، وعارف ان شعورك من جواك اضعاف اللي ظاهر عليك خصوصًا إنك كنت متعلق بيه جدًا، بس انت اكيد مش محتاج أقولك الكلام دا بس انا بذكرك، انه في مكان أحسن دلوقت، وانه كمان اكيد مبسوط بالموتة دي، يا بَخته والله دا مفيش أحسن من كدا يا صاحبي.. ربنا يغفر له ويتجاوز عن سيئاته بحق ما كان بيحب النبيﷺ. اتفتحت في البُكا تاني ومقدرتش امسك نفسي اما قالي كدا.. من بين دموعي قلت: انا عمري في حياتي ما شوفت حد بيحب النبي كدا.. اسمع عن ناس كتير تحبه لكن متهيألي مشوفتش حد بيعمل زي أبويا.. انا كنت من ونا صغير أوي موعاش على حاجة في الدنيا غير حب أبويا للنبيﷺ، كان أُمّي اه،..لكن كان يحبه حب عظيم.. يقولي انا بعلمك عشان تردلي الجميل وتعلمني اكتر عن النبي، كنت بحفظ الأحاديث في المدرسة او أي سُنة واجي احفظهاله.. كان يحب يسمعها مني اوي ويطلب مني أعيد عليه تاني وتالت.. بس انا كنت عيل مش فاهم.. لما كبرت فهمت.. فهمت ليه لما كنت اصحى بالليل واعدي جنب أوضته الاقيه قاعد بالليل يعيط ويقول وحشتني يا سيدي! مكنتش فاهم مين المقصود، كنت فاكره حد مات قريبه او يمكن يقصد جدي مكنتش فاهم.. لما كبرت فهمت.. فهمت ابويا لما كانت تيجي سيرة سيدنا النبي ﷺ ليه مكنش بيعرف يمسك دموعه.. ليه مكنش بيعرف يقول عنه اي كلام رغم انه كان عارف كتير عنه عشان كان بيحب يعرف عشان يقلد كل حاجة كان بيتعلمها من سُنته صلى الله عليه وسلم.. كنت بقول لنفسي هو فيه حد يحب حد لدرجة انه يقعد كل يوم يعيط عشان واحشُه! لما طلع اختراع (خاتم التسبيح دا) اشتريتله واحد هدية وقولتله بضحك اتفضل يا سيدي عشان تعد عليه ورد الصلاة على النبي بدل سبحتك اللي حباتها قليلين دي.. فرح جدا وحضني.. لما كنت امسك خاتم التسبيح اخر اليوم وكان بيبقا عندي فضول اعرف هو عد قد ايه، بلاقي الاف الآلاف .. هو ازاي كان بيحبه اوي كدا وهو ميعرفش عنه حاجة لإنه مش متعلم! مسحت دموعي وحاولت أهدى: انا مرة سألته قولتله ايه سر تعلقك بالنبي؟ قالي : والله يابني دا رزق.. ونا يمكن حظي قليل في حجات كتير.. بس رزقي كبير في حبي ليه.. دا هو سبب الخير اللي في حياتي كله. انا والله بحسده على رزقه دا.. أبويا كان مبيعديش اسبوع غير ويشوف النبي فيه.. وكان يصحى طاير من الفرحة .. انا مش قادر أوصفلك..مهما قُلت مش هتستوعب انا والله ما عارف اقولك ايه! دا كأنه كان عايش معاه.. اتعلمت منه حب النبي واتعلمت منه مسبش اي سنة غير واعمل بيها.. لما ابويا مات فرحت والله عشان ربنا حقق مُناه.. كان طول عمره يقولي نفسي ازوره.. عارف مات ازاي!؟ صاحبه اللي كان معاه واتعرف عليه هناك، بيقولي اول ما شاف المسجد النبوي بدأ يسرع في خطواته ويقول وحشتني يا سيدي.. وحشتني يا حبيبي، شكرًا يارب شكرًا يارب عشان حققت منايا قبل ما اموت.. ولما دخل بكا بكاء مرير.. لدرجة ان الناس أشفقت عليه ولحاله.. ابويا فضل ملازم للمسجد وقلبه متحملش الشوق دا كله ومات بعد كام ساعة جواه.. انا فرحان علشانه.. وزعلان عشان سابني.. يااخي والله الدنيا دي هينة اوي! ياريتني عندي ربع حبه دا.. يا بخته برزقه.. احنا خدنا ايه من الدنيا! على الاقل حبه للنبي هيشفع فيه.. احنا معانا ايه يشفع فينا. - يا صاحبي.. هون على نفسك..الله يرحمه، وانت حظك الجميل ان دا كان والدك.. الراجل الطيب البركة.. الله يعف عنه ويغفرله بحبه للنبي.. خُد خاتمُه من بعدُه وكمل.. اوعى بيتكم ينطفي من نور محبة الرسول! واوعى الخلوات تفتقد محبتكم لِيه.. وضاعف اورادك.. ياريت رزقنا من الدنيا محبته. قال أنس رضي الله عنه: \"فأنا أحب النبي صلى الله عليه وسلم وأبا بكر وعمر، وأرجو أن أكون معهم بحبي إياهم، وإن لم أعمل بمثل أعمالهم ذاد الدنيا والآخرة \"صَلَّىٰ عليكَ اللّٰهُ يا غَيْمًا هَمَىٰ فَوقَ القُلوبِ فحَلَّت الرَّحَمَاتُ\".💙 صاحبة الأثر الجميل 🤍. ❝ ⏤صاحبة الأثر الجميل Aya Alsayed