❞ _عزومة إيه بس يا ماما دلوقتي إحنا لاقيين ناكل!! = صوتك يا بت الناس تسمعك يقولوا علينا بنشحت. _ ما إحنا هنشحت فعلاً باللي أنتِ بتعمليه دا. = هو أنتِ دافعة حاجة من جيبك يبت أنتِ، دي عادة عندنا في رمضان وربنا ما يقطعلنا عادة، وهم لسه ساكنين جداد دا رمضان كريم هااا. _ يحبيبة قلبي أنا مقولتش حاجة، بس جيران إيه اللي نعزمهم النهاردة؟ = ملكيش أنتِ دعوة خشي بس أعملي السلطة وبلي البلح وسقعي ميه و.. _ وإيه ها وإيه؟ محررلكيش القدس بالمرة؟ = هتلحقي تحرريها قبل المغرب؟ _ اللهم إني صايمة. = اللهم قوي إيمانك يختي، يلا وريني جمال طلتك. _ماشي يا ماما أما أشوف جو مائدة الرحمن اللي أنتِ عملاه دا. مشيت وسبتها وهي بتحسبن عليا أصلها بتموت فيا، دخلت المطبخ وبليت البلح وسقعت الميه وعملت السلطة وشوحت اللحمه كمان إن شاء الله محد حوش. _جيرانك دول جايين أمتى؟ = جيرانك! على أساس إنك من المحافظة المجاورة!! _ شوفي بتجرجريني عشان أرد عليكِ، بس أنا مش هعمل كده عشان تعرفي إنك عرفتِ تربي. = أنتِ هتقوليلي، قومي البسي العبايه ولفي حجابك كويس. _ ليه في شنبات جاية ولا إيه؟ = شنبات! أنتِ صايمة أنتِ! _ والله صايمة عيزاني أقولك إيه طيب...أستني. حبيت أكلم أمي من نقطة ضعفها ألا هي لغة الضاد: هل سيحضر رچال على الفطور أُماه؟ = أجل عزيزتي. _بارك الله فيكِ...إيه!!! هتجيبي رجالة البيت في رمضان! في رمضااان! حدفتني بسلاح الأمهات ف دماغي˝ الشبشب ˝ : طب بزمتك دي أخلاق أمهات ف رمضان! =دا ابن جارتنا هيجي هو وأمه يفطروا عندنا. _ لا والله إبن جارتنا!! مش تقولي يا ماما كنت مفكراه حد غريب، أنتِ بتهزري يا ماما مهو أجنبي عننا برضو. = لا يا بت دا مصري زينا عادي. _ الصبر ياااارب. _______________________ _يا ماما جيران مين بس اللي عزمنا دا إحنا لسه ناقلين مكلمناش أسبوع!! = دي ست جدعة أوي إسمها أم آية، عزمتني وحبت تقوي العلاقة بينا كمننا منعرفش هنا حد وكده. _علاقة إيه يا ماما هو أنتِ لحقتي! دا العفش لسه نقله مكملش حتى!! = نحن في عصر السوشياال ميديا. _ ابتدينا بقا جو اسبسيتون أهو. = متقلقش يحبيبي هم 5 دقايق على الفطار وأبقى اتحجج بأي حاجة وأمشي. _ 5 دقايق إيه اللي أفطر فيهم تعويض عن صيام ١٣ ساعة يا مؤمنة!!! = أدخل نام يا خالد أنت بس وعلى المغرب يحلها الحلال. _ آه يخوفي منك يا أم خالد. لقيتها ضحكت كده وسابتني ومشيت، مكنتش مستريحلها بس ماشي خلينا وراها لما نشوف اخرتك يا نوجا. ____________________ _ ها يا نجاة عملتي إيه؟ = قولتله يدخل ينام على ما المغرب يأذن. _ يعني جايين أكيد؟ = إن شاء الله والعروسة عاملة إيه؟ _عروسة! يسمع من بوقك ربنا يا نجاة نفسي أفرح بيها قبل ما أموت. = بعد الشر عليكي يا هدى متقوليش كده، إن شاء الله نفرح بيهم وبخلفهم كمان. _ يارب يا نجاة آه لو يحصل، دا أنا هتعلم الزغرطة مخصوص عشان أزغرط في فرحهم. = قولي يارب بس وهنزغرط كلنا إن شاء الله، يلا هروح عشان ألحق أصحي خالد قبل المغرب. _ وأنا كمان هوضب السفرة على ما تيجوا. _____________________ _ يلا يا آية عشان الناس زمانهم جايين. = ناس مين يا ماما دول لو وفتحنا الباب هنلاقيهم في وشنا متكبريش الموضوع يا دودو. _ هو أنتِ هتتاخدي غياب لو مردتيش، يلا خشي البسي العباية. = هو أنتِ عايزاني أيلا وخلاص؟ _ اه يلا. ضحكت ومشيت: لا حول ولا قوة إلا بالله، لما نشوف الجيران دول حكياتهم إيه. ______________________ _خالد أصحي يحبيبي يلا عشان المغرب قرب يأذن. = أقوم آذن يعني ولا إيه يا ماما؟ _ يحبيبي تأذن إيه بس رمضان كريم. = أنتِ مصحياني عشان تفكريني برمضان يا ماما!!! _ يوووه يا خالد قوم بقا إحنا معزومين على الفطار عيب كده، الناس زمانها فطروا واتسحروا كمان. = فطروا واتسحروا! ليه يعني هم في الصين، دول قدامنا يا ماما، وسعت منك أوي يعني. _ طب قوم يلا عشان تلحق تصلي في المسجد وتحصلني على هناك. = لا بقولك إيه أنا أصلاً محروج أدخل معاكِ، عايزاني أدخلهم لوحدي! _ متقلقش ابعتلي مسدچ بس وأنا هفتحلك أنا. = أنتِ ليه مش مقتنعة إننا ناقلين هنا بقلنا كام يوم، دا إيه العشم اللي مش في محله ذا!!! _ يلا قوم وبطل وجع قلب، هسبقك أنا. ______________________ _ أفتحي الباب يا آية. = حاضر يا ماما. روحت أفتح الباب وقبل ما أفتحه بصيت على المرايا وعدلت الطرحة، قمر قمر يعني مفيش كلام، فتحت لقيت واحدة زي القمر اللهم بارك عمرها تقريباً في أول الأربعين، وطيبة وحنان الدنيا كله في وشها وملامحها بصتلي وابتسمت: اللهم بارك، أنتِ آية صح؟ بادلتها الإبتسامة: أيوا أنا وحضرتك أكيد مدام نجاة. : دا أنتِ حافظة بقا. _لا دا أنا أعجبك أوي...أتفضلي. ضحكت ودخلت، ماما جت وحقيقي استغربت السلام الحار اللي كان بينهم وحاجة في أخر يخربيت الإجتماعية يجدع. المغرب أذن وكسرنا صيامنا بكوباية تمر بلبن، وقِمت بيهم الصلاة، كل دا ومشوفتش شنب واحد حتى يوحد الله جه لحد دلوقتي. :حرماً قالتها مدام نجاة بكل هدوء ونبرة بجد تخليك عايز تبوسها من كتر السلام النفسي اللي كان ظاهر فيها. رديت عليها بإبتسامة: جمعاً إن شاء الله. ماما قامت وشالت المصلية: يلا ي آيه قومي معايا نحط الأكل ع السفرة. قمت ومدام نجاة قامت معانا وحطينا الأكل على السفرة سوا قد إيه إحنا بنحترم ضيوفنا ومش بنتعبهم، كنت فرحانة جداً إن في حد لطيف جه شاركنا فطارنا وحقيقي رمضان طلع شهر اللمه فعلاً، اكتشفت إن اللمه مش بالعدد بالعكس دا ممكن يكون شخص واحد بس، لكن وجوده بيكفي ويزيد كمان. قعدنا على السفرة ولقيتهم قاعدين محدش مد إيده، فقولت أسأل إيه سبب الإضراب دا: خير يجماعة رمضان كريم. مدام نجاة بتوتر إلي حد ما: معلش يحبيبتي خالد زمانه على وصول. _خالد!! خالد مين! : إبني. _ااه الشنب!! أوووبس!!! حطيت إيدي على بؤي وأمي بصتلي بصه جابت أجلي وأنا قاعدة، العفوية دي غريبة جداً. أمي حبت تغطي على النيلة اللي أنا قولتها دي: معلش يا نجاة آيه متقصدش هي.. ردت عليها السكرة: لا يحبيبتي ولا يهمك ما أنا عندي نور زيها كده بس هي معزومة برا عند صحبتها. وفي منتصف الحديث الشيق عن تحليل كلمتي، الباب خبط معلن حضور الشنب، أقصد الأستاذ خالد أمي تسكت؟ لا أزاي! _ قومي يا آية أفتحي الباب. = إحم باب إيه يا ماما يحبيبتي؟ _ سلامتك يا آية باب الشقة يبنتي. =هو لازم! وكان الرد هو نظرة الله لا يوريك، قُمت وأنا بقول في سري˝ دا عندي تتفتح دماغي ولا إني أفتح الباب لشنب من شنبات الله ربنا يسامحك يا ماما˝ أخدت نفس ولا كأني لا راحة أحارب وفتحت الباب بصيت، لا لقيت شنب ولا حتى دقن!! كان حالق دا ولا إيه استغفر الله العظيم يارب. بص في الأرض وقالي: لو سمحتي هو دا بيت الأستاذة هدى. بصيت ف الأرض أنا كمان وأنا بقول ف سري ˝ أستاذة هدى!!! دي لو سمعتك بتقولها كده كان أغمى عليها˝ بعدت عن الباب شوية: أيوا هو أتفضل. دخل وقال تحية الأسلام وكلنا ردينا عليه ولقيت أمي ومدام نجاة انشكحوا كده لله في لله وإحنا داخلين. فطرنا وخلصنا فطار، وكنت قاعدة زي الكرسي، إلا لو حد وجهلي سؤال، غير كده أنا لا أسمع لا أرى لا أتكلم، وهو كان قاعد يحكي عن شغله ودراسته وحسيت من نبرة صوته إنه كاريزما كده وعنده طموح وهدف عايز يحققه مش عايش كده والسلام. : نحلي بقا؟ لا دي أمي عادي. خالد رد عليها بكل احترام: طب شوية طيب دا أنا مش قادر أخد نفسي من حلاوة الأكل. : يا بكاش دا أنت مأكلتش حاجة. _ لا خالص والله دا أنا كلت لما شبعت تسلم إيدك. كنت حاسة إن أنا وطنط نجاة ضيوف شرف في الموضوع، أمي تكست؟؟ لا أزااااي! : دا آيه اللي عملاه يحبيبي مش أنا. يخربيت الكدب اللي بقا عيني عينك في رمضان دا!! معرفش بصلي ولا لأ بس أنا كنت قاعدة أعد في كام شرشورة في شراشير السجادة بتاعنا. سمعت صوته: تسلم إيديها. كان بودي أرد والله بس مبعرفش أكون جملة مفيدة في المواقف اللي زي دي، فأكتفيت ببسمة مظهرتش أصلاً بس يعلم ربنا إن النية كانت موجودة. العشا أذنت وهو قام بينا التراويح وحقيقي مكنتش عايزاه يخلص صوته خلى عيني تدمع من حلاوته كان عنده خشوع رهيب في الصلاة وصل لقلبي بدون أي مجهود يُذكر. : السلام عليكم ورحمة الله وبركاته، السلام عليكم ورحمة الله. سلمنا وخلصنا الصلاة وكنت فخورة بيه ولا كأني أمه ومبسوطة إني عرفت أربيه رغم إني متكلمتش معاه كلمتين على بعض. أمي طبطبت ع كتفه: اللهم بارك ربنا يحفظك يحبيبي. ابتسملها وقال: آمين يا أمي وإياكِ. : نحلي بقا!!! كنت مستغربة أصرار أمي على التحلية لدرجه إني شكيت إنها هتحطله حاجهة فيها وعايزة تخلص منه. قعدنا في الأنترية وأمي ومدام نوجا قاموا يجيبوا الحلو مش فاهمة حلو إيه دا اللي يجبوه 2 دا لو الشيف بوراك اللي عامله مش هياخد كل الوقت اللي خدوه دا. كسر الصمت اللي حل علينا بجملته: جو قديم أوي اللي بيحصل دا. أستغربت سبب الجملة: نعم!!! _أنتِ مش فاهمة ولا إيه؟ = لا الحقيقة أحب أفهم منك هو إيه اللي قديم؟ _ يعني إنهم يتحججوا بالحلو وإصرار أمي إني أجي هنا على الفطار رغم إننا مكملناش أسبوع بس لما شوفتك فهمت السبب. كنت عماله أسمعله وأنا مش فاهمة الغلط فين برضو!! للدرجادي الصيام مقصر على ذكائي!! =بص هو أنت أكيد عايز توصلي رسالي بس أنا... أنا مش فاهمة. _أصلاً! =أحم... أصلاً. _ تأخرهم الكتير دا مش بيوضحلك حاجة مثلاً؟ = اه طبعاً بيوضحلي. _طب الحمد لله. = بيوضحلي إن الحلويات كتير جداً لدرجة إنهم اتأخروا أوي كده. حبيت أثبتله إنه مش لوحده اللي بيفهم بس تعبيرات وشه حسستني أني مبفهمش وبجدارة كمان، ياااه قمة الإحراج. ضحك وبص الناحية التانية، سألته بعدم فهم وضيق:هو أنا ممكن أفهم إيه سبب الضحكة دي؟ بصلي وسكت: لا عادي بس ردك أبهرني الصراحة. _ إيه المبهر في الموضوع أنتو مبتكلوش حلويات في بيتكوا ولا إيه؟ = هو الموضوع أصلاً ملهوش علاقة بالحلاويات بس ماشي لما يجوا قوليلهم إن أنا مشيت عشان ورايا شغل عن إذنك يا...آية. _ أنسة آية لو سمحت. = نعم!!! _ حافظ على الألقاب بينا أنا بحب الحدود في التعامل. = وماله نحافظ على الألقاب لحد ما تفرج. سابني ومشي قبل ما يديني فرصة أسأله يعني إيه لما تفرج؟!!! اليوم عدى وطنط نجاة استأذنت ومشيت، ماما جت قعدت جمبي بكل إنشكاح. _ يا ستار يارب خير يا ماما. = ها؟ _ ها إيه؟ = ها يعني نقول مبروك؟ _ مش عايزة أكسر فرحتك دي بس أنا مش فاهمة حاجة....إطلاقاً. = إيه رأيك في خالد؟ محترم وإبن ناس وبصراحة كده أنا ارتحتله. _ أنا مالي بقا بكل دا وبعدين أقول رأيي فيه ليه هو أنا هخطبه!! = أينعم. _ مش فاهمة! = أنتِ مش حافظة غير الكلمة دي. _ لا ثواني، يعني أنتو كنتوا مقعدنا مع بعض عشان....!!! جاتلي لحظة إدراك وبعدها قولت بصدمة: وأنا اللي عمالة أقوله الحلو و...والشيف بوراك!!! اااععععع. = أنتِ هبلة ولا إيه؟ _ وأتاريه عمال يقول الموضوع ملهوش علاقة بالحلو طب كنتِ أديني فكرة طيب، ليه تطلعي بنتك هبلة قدام الناس كده؟!!! ________________________ _ مكنش ليه لزوم على فكرة اللي عملتيه دا. = هو إيه اللي أنا عملته؟ _ يا نوجا...يا نوجا أنتِ كبرتي ع الكلام دا. = بصراحة بقا أنت مكنتش هتيجي غير بكده، متنكرش إن البنت عجبتك. لما أمي قالتلي الجملة دي أفتكرت ردودها عليا، وظهرت إبتسامة لا إرادية على وشي. = أظن إن ابتسامتك دي رد كافي وزيادة كمان صح؟ اتنهدت وأنا مش عارف أقول إيه بس أنا كنت مرتاح في القعدة معاها، كنت مبسوط _صح يا نوجا. ___________________ _ عريس؟ = اه عريس وجهزي نفسك النهاردة عشان هم جايين. _ هو أنتِ ليه مش بتقوليلي الحاجة غير في يومها للدرجادي مليش لازمة ولا رأي في البيت دا؟ = بلاش كلام كتير وفري طاقتك للصيام. _ ماما... = الله أكبر. _ صلي صلي ماشي يا ماما مااااشي طب قوليلي إسمه إيه طيب؟ = الله أكبر. _ ما خلاص يستي دا أنتِ بتصلي جداً. ___________________ _ أنا أديتهم معاد بعد الفطار النهاردة. = دا أنتِ مظبطة كل حاجة بقا. _ عايزة أقولك نفسي تكتبوا الكتاب النهاردة قبل بكرا. = مش لما نعرف رأيها الأول؟ _ هتوافق بإذن الله، بحق الأيام المفترجة دي. = يلا أنا هنزل بقا ادعيلي يا نوجا. _ روح ي خالد يإبن نجاة ربنا يجعلها من نصيبك وتقابلها ف طريقك. = أقابل مين بس استهدي الله رمضان كريم. _ يسيدي أبقى غض بصرك. = لا أقنعتيني..يلا سلام. _ في حفظ الله. نزلت وأنا مستعجل ولحسن حظي لقيتها، بس كانت طالعة ترمي الزباله، غضيت بصري ولسه رايح أقول دعواتك يا نوجا، لقيتها قفلت الباب في وشي..أحم إيه الإحراج دا!! _______________ _ مالك يآية بتنهجي كده ليه؟ = هااا لا مفيش أصل الجو حر. _ حر إيه يبنتي إحنا في الشتا. = لا والله؟ _ اه والله. = يبقى الجو السقعة بتسألي أسئله غير منطقية. _ والله ما في حد غير منطقي غيرك. = طب يا ماما أنا في المطبخ مع البلح. _ لا سيبك من البلح والتمر وخشي شوفي هتلبسي إيه النهاردة؟ = ليه؟ _ خشي يآية وأتمسي. = طب... _ لا. = قد إيه أنتِ أم ديمقراطية. ___________________ وحان الوقت المنتظر. كنت قاعدة قدام المرايا اخترت چيب سودة وبلوزة رصاصي مخططة في أبيض وطرحة سودة، واكتفيت بكحل خفيف، كان لبس بسيط وبصراحة مفيش أحلى من البساطة الهادية، سمعت ضحكهم برة، هم نسيوني ولا أي؟!! كنت قاعدة مستنية ماما، لقيتها داخلة عليا بصينية عليها كوبايات ساقع، ولسه هاخد كوباية وأشربها لقيتها بعدت الصينيه: يبت هتنقطيني وتموتيني ناقصة عُمر. _ هو أنا عملت حاجة مش ببل ريقي اللي نشف دا!! دا أنا خللت من القعدة. = خدي الصينية وأطلعي قدامي، الناس برا متسمعيش حد بينا. طلعت وأنا بحاول أركز إمي متكفيش على وشي بصينية الكوبايات. طنط نجاة بإبتسامة وإنشكاح : ماشاء الله تعالي يآية أقعدي هنا. قعدتني على مسافة مش بعيدة من خالد وشوية واتحججوا بالحلو ومشيوا. _ الحِجة دي مش بتفكرك بحاجة؟ ابتسمت وبصيت في الأرض وأنا بلعب في إيدي: جو قديم؟! = تؤتؤ إن الحلو كتير جداً لدرجة إنهم هيطولوا وهم بيجيبوه. فلتت من بين شفايفي ضحكة، وضحك معايا وقال: أمي بتقول إنك بتعرفي تعملي حلويات وبتمدح في طعمها جداً. _ بحبها. = يبختها. _ بتقول حاجة؟ = بقول كنت عايز أفتح مخبز حلويات وعايزك تشاركيني فيه ويبقى أساسه الحب، والمشاركة، والدفا، عشان كل ما أدخله أقدر أقول الدار أمان، وإن شاء الله نوسع المشروع ونجيب مخابز صغيرة كده وتبقى حلويات برضو. _ بس ماما قالت إنك مهندس مش خباز. = مهو أنا هنا مقصدش المخبز. _ مش فاهمة! = تتجوزيني؟ _ تقصد إيه بالمخبز؟ = بيتنا. _ والمخابز الصغيرة؟ = عيالنا. بصيت في الأرض ومقدرتش أمنع ابتسامتي، كريتيڤ أوي...لسه راحة أقول موافقة، لقيت ماما داخلة بزغروطة جابت أخر الشارع، ومدام نجاة وماما فضلوا يحضنوا ويهنوا بعض، بصيت أنا وخالد لبعض وقعدنا نضحك على منظرهم، البيت اتملى بهجة مش طبيعية، يعجز اللسان عن وصفها... وفعلاً الدار كانت أمان. اول سكريبت 😂🤍 لصاحبة الأثر الجميل 🤍. ❝ ⏤صاحبة الأثر الجميل Aya Alsayed

❞ أمْرَخ يمرُ اليومُ تلو الآخر.. يشحُب فيها لونُك، و تفتقد للبهجة والحياة إلى أن تصبح باهتًا تمامًا.. لا لون يكسُو مُحيَّاك، مثل لوحة مرسومة جميع ما في الصورة مُلوَّن ماعدا شخص واحد.. ملون بالأبيض والأسود قد تكون ملامحه مميزة، قد يكون ملفتًا للأنظار، لكن بلا روح، لم يعد يرغب بشيءٍ في تلك الدنيا يرى جمال الدنيا من حوله ولم يعد لديه الرغبة في الحياة، أو حتى اقتناص الفرص الثمينة في العودة للحياة! كل الفرص التي حَلُم بها يومًا ما ضاعت منه هباءً منثورًا، فلن يغامر سمرة ثانية من أجل فرص لن تتحقق! هو يعلم جيدًا انه مهما حاول سيعود لحالته المزرية مرة أخرى.. لكن يظل الفضول سيد الموقف.. فهل يستطيع أن يعود؟! نحن الأبيض والأسود.. نحن الحياة الحقيقية.. ❝ ⏤دنيا حسين